හිටපු අගමැති Shinzo Abe ගේ ඝාතනයෙන් පසුව, පාලක ලිබරල් ඩිමොක්‍රටික් පක්ෂයේ සාමාජිකයන් ලෙස කටයුතු කරන ඔහුගේ බලවත් කණ්ඩායම තනි නායකත්වයක් වෙනුවට සාමූහික නායකත්වයක් යටතේ ඉදිරියටත් ක්‍රියාත්මක වනු ඇතැයි අපේක්ෂා කෙරේ.
අනාගතයේදී නායකත්වය ගැනීම සඳහා සටනක් ඇති විය හැකි නමුත්, කණ්ඩායමේ සාමාජිකයින් අතර පවතින සමගිය පවත්වා ගැනීමට සහ ඉදිරියේදී සිදුවිය හැකි බිඳවැටීම් වළක්වා ගැනීම වෙනුවෙන් දැනට Abeගේ අනුප්‍රාප්තිකයෙකු සභාපති ලෙස නම් නොකිරීමට පක්ෂයේ සාමාජිකයින් සාමූහික පියවරක් ගෙන තිබේ .
පාර්ලිමේන්තුවේ සභා දෙකෙහිම 100ක් පමණ වන Abe ගේ පාර්ශ්වයේ සාමාජිකයන්, ඔහුගෙන් පසුව නායකත්වයට පත් විය යුත්තේ කවුරුන්ද යන්න පිළිබඳ සම්මුතියකට පැමිණ නොතිබීම මෙන්ම කණ්ඩායමට ගැටුම් ඇතිවීමේ හා බිඳී යාමේ ඉතිහාසයක් තිබීමද එයට හේතුව බව පැවැසේ.
Seiwaken නොහොත් Seiwa ප්‍රතිපත්ති අධ්‍යයන කණ්ඩායම ලෙස හැඳින්වෙන මෙම කණ්ඩායම LDP හි විශාලතම නියෝජනය වන අතර අගමැති Fumio Kishida ගේ රජය තුළ සැලකිය යුතු බලපෑමක් ඇති කිරිමේ හැකියාවද ඔවුන්ට පවතී. ජපානයේ දීර්ඝතම කාලයක් අගමැති ධුරය දැරූ Abe විසින් වත්මන් නායකත්වය තීරණය කර තිබූ බැවින් "Abe කණ්ඩායම" යන නාමයෙන් සාමාජිකයින් සියලු දෙනාම එක්සත් වන බවට Seiwaken හි වැඩබලන සභාපතිවරුන් වන Ryu Shionoya සහ Hakubun Shimomura තහවුරු කළහ.
