පසුගියදා ග්‍රීසියට ආසන්න අයෝනියානු මුහුදේදි, කාර්මික දෝෂයක් හේතුවෙන් ගිනිගත් ඉතාලියට අයත් Euroferry නම් නෞකාවේ සිටි 11 දෙනෙක් මේ වන විට අතුරුදහන්ව ඇතැයි සැලවේ. කෙසේ වෙතත් අනතුරට ලක්වූ එක් පුද්ගලයකු ගලවා ගැනීමට මෙහෙයුම් කණ්ඩායම් සමත් වී තිබේ.
ඉතාලි වෙරළාරක්ෂක නිලධාරියෙකු සඳහන් කර සිටියේ, බෙලරුසියානු ජාතිකයෙකු වන මෙම තැනැත්තා ගලවා ගන්නා මොහොත වන විට, නැවේ පසුපස බරාදිය අසල සිටි බවත් ඔහු මේ වන විට යහපත් සෞඛ්‍ය තත්වයෙන් පසුවන බවත්ය. මගින් 290ක් සහ රථවාහන 185ක් රැගෙන පසුගිය සිකුරාදා ග්‍රීසියෙන් ගමන් ආරම්භ කළ නෞකාව ඉතාලියට ආසන්න මුහුදේදී ගිනි ගැනීමට පටන් ගෙන තිබුණි. ඉතාලි ගලවා ගැනීම් කණ්ඩායම් විසින් මගින් 280ක් නිරුපද්‍රිතව නෞකාවෙන් ඉවත් කර ගැනීමට කටයුතු කර තිබූ අතර අතුරුදහන් පිරිස සොයා තවමත් මෙහෙයුම් ක්‍රියාත්මක වන බව සැලවේ.
