ජපානයෙන් පිටත පදිංචි ලඟම ඤාතියෙකුට වියදම සඳහා මුදල් යවන්නේ නම් වාර්ෂික ආදායම් බදු ගෙවීමේදී ඒ සඳහා සහනයක් ලබාගැනීම.
ඔයත් ලංකාවේ හෝ වෙනත් රටක පදිංචි ඔයාගෙම පවුලේ කෙනෙක්ට වියදමට මුදල් යවනවද? එහෙනම් ඉතින් ජපානේ වාර්ෂිකව ඔයාගේ ආදායම් බදු හදනකොට බදු අඩු කිරීමක් කරගන්න පුළුවන්.
මේ බදු අඩු කරගැනීම සඳහා අයදුම් කිරීම මුදල් උපයන ආකාරය අනුව කොටස් දෙකකට වෙන් කරලා ගන්න පුළුවන්. පලවෙනි එක තමයි තමන්ගේම කියල ව්‍යාපාරයක් හෝ ආයතනයකට සම්බන්ද නොවී Freelance ආකාරයට මුදල් උපයන අය. දෙවෙනි එක තමයි ආයතනයක සේවකයෙක් විදියට වැඩ කරමින් ආදායම උපයන අය. මෙතනින් වැඩි පිරිසක් ඉන්නේ දෙවෙනි කොටසේ නිසා ඒ අය සැලකිල්ලට අරගෙන තමයි මේ පහලින් තියන ටික ලියන්නේ.
මම කලින් ලිපියක් ලිව්වා කොහොමද ජපානේ ආදායම් බදු ගණනය කරන්නේ කියල. ඒ ලිපිය කියවල පොඩි අදහසක් ගන්න එතකොට ජපානේ ආදායම් බදු හදන්නේ කොහොමද කියල තේරුම්ගන්න ලේසි වෙයි.
https://www.facebook.com/japantasy/posts/252682026494502
බදු සහනය ලබාගැනීම සඳහා ජපානයෙන් පිටත පදිංචි මේ පහලින් කියල තියන පවුලේ අය එකතු කරලා අයදුම් කරන්න පුළුවන්.
ඔබගේ - බිරිඳ/සැමියා, ළමයා, අම්මා, තාත්තා, ආච්චි/සීයා, සහෝදර සහෝදරියන්.
ඔබගේ බිරිඳ හෝ සැමියාගේ - අම්මා, තාත්තා, ආච්චි/සීයා, සහෝදර සහෝදරියන්
මෙන්න මේ ඉහත කියල තියන ඕනෑම කෙනෙක්ගේ බැංකු ගිණුමකට ඔයා ජපානයේ ලියාපදිංචි ආයතනයක්/බැංකුවක් හරහා මුදල් යවනවා නම් ඔයාටත් මේ බදු සහන ලබාගැනීමට පුළුවන්. මෙතැනදී කියන්න ඕන දෙයක් තමයි මේ මුදල් නිත්‍යානුකුලව යවන ඒවා වෙන්න ඕන. ඒ වගේම අදාළ පුද්ගලයාගේ බැංකු ගිණුමට කෙලින්ම මුදල් යවන්න ඕන, ඔයාගේ ලංකාවේ තියන ගිණුමකට මුදල් යවල, එකෙන් transfer කරලා තිබුනට බෑ. ඒ වගේම මෙහෙම මුදල් යවන වාර ගණනක් හෝ යවන මුදල් ප්‍රමාණය වැදගත් වෙන්නේ නෑ. ඒ කියන්නේ අවුරුද්දේ හැම මාසෙම යවල තියෙන්න ඕන නෑ.
දැන් බලමු කොහොමද මේ වැඩේ කරගන්නේ කියල. (මේ සඳහා ආයතනයක සේවය කරමින් වැටුප් ලබන, වෙන ආදායම් මාර්ගයක් නොමැති කෙනෙක් උදාහරණයට ගමු.)
ඉතින් ඔයත් මෙහෙම ආයතනයක සේවය කරන කෙනෙක් නම් ඔයාගේ මාසික ආදායමෙන් බදු සඳහා මුදල් කපාගන්නවා. මෙහෙම කපාගන්න බදු මුදල් වර්ෂ අවසානයේදී ගණනය කරලා
අදාළ අඩුකිරීම් සිදු කරලා ආදායම් බදු ප්‍රමාණය සඳහන් කරලා 給与所得の源泉徴収票 (Salary income withholding slip) එකක් ඔයාට ලැබෙනවා. මේක දෙසැම්බර් මාසයේ හෝ ජනවාරි මාසේ ඔයාට ලැබෙන්න පුළුවන්. මේකේ 源泉徴収税額 කියල තියන තැන සඳහන් කරලා තියනවා ඔයා බදු විදියට ගෙවපු ගණන. මේ විදියට ගණනය කරද්දී මාසෙන් මාසේ ඔයාගෙන් පඩියෙන් කාපගත්ත මුදල අය කල යුතු බදු මුදලට වඩා වැඩියි නම් ඒ වැඩියෙන් ගෙවන ලද මුදල ඔයාට Tax adjustment (年末調整) එක විදියට ඔයාට ලැබෙනවා.
මෙහෙම ආයතනය මගින් බදු සකසන අයට තමන්ගේ පවුලේ කෙනෙක් (බිරිඳ/සැමියා හෝ ළමයෙක්) යැපෙන්නෙක් (dependent) විදියට ජපානේ ජිවත් වෙනවා නම් එයාලව ආයතනය මගින් කරන බදු සැකසීමට එකතු කරන්න පුළුවන්. ඒකට කරන්න තියෙන්නේ වසර අවසානයේ ආයතනය මගින් ඔයාට දෙන 年分扶養控除等（異動）申告書 forms වල අදාළ විස්තර පුරවල, අවශ්‍ය කරන ලියකියවිලි එක්ක ආයතනයට දෙන එක විතරයි. එතකොට අවුරුදු 16ට වැඩි අය සඳහා එක් පුද්ගලයෙකුට යෙන් 380,000ක් (ආදායම අනුව) ඔයාගේ මූලික බදු කොටසෙන් ඉවත් කරලා තමයි අදාළ බදු ගණනය කරන්නේ.
හැබැයි ජපානයේ ජිවත් නොවන ඔයාගෙන් යැපෙන්නෙක් ඉන්නවා නම් සහ ඔයා එයාලට වියදම සඳහා මුදල් යවනවා නම්, ඔයාට ඒ අයව වෙනම tax return (確定申告) එක සඳහා එකතු කරන්න වෙනවා.
මේ සඳහා වර්ෂ අවසානයේදී 給与所得の源泉徴収票 එක ඔයාට ලැබුනට පස්සේ මාර්තු මාසේ 15ට කලින් ටැක්ස් ඔෆිස් එකට ගිහින් හෝ My Number කාඩ් එක හරි e-tax portal එකේ රෙජිස්ටර් වෙලා තියනවා නම් e-tax වෙබ්සයිට් එක හරහා ලංකාවේ පදිංචි ඔයාගේ ඤාතියාගේ විස්තර ඔයාගෙන් යැපෙන කෙනෙක් විදියට ඇතුලත් කරන්න පුළුවන්. මෙහෙම ඇතුලත් කරාම වෙන්නේ බදු ගණනය කිරීමේදී එක පුද්ගලයෙක් සඳහා යෙන් 380,000 ක මුදලක් අඩු කරලා තමයි බදු ගණන් කරන්නේ. ඒ කියන්නේ අම්මා තාත්තා දෙන්නට වෙන වෙනම සල්ලි යවලා තිබුනොත් යෙන් 760,000ක් මුලික අඩු කිරීම් වලට එකතු කරලා තමයි බදු ගණන් හදන්නේ. මෙහෙම ගණන් හැදුනම ඔයා ගෙවන්න ඕන බදු ප්‍රමාණය අඩු වෙනවා.
දැන්අ අපි උඩින් ගත්ත උදාහරනේ හැටියට ඔයා දැනටමත් බදු ගෙවල ඉවරයි නේ. ඒක 給与所得の源泉徴収票 එකේ 源泉徴収税額 කියල තියන තැන සඳහන් කරලා තියනවානේ. ඒක නිසා මෙතැනදී වෙන්නේ ඔයාගේ බදු මුදල නැවත ගණනය වෙලා ඔයා ගෙවල තියන මුදලෙන් අඩු වෙන්න ඕන මුදල නැවත ඔයාට දෙනවා. අපි උදාහරණයකට ගමු ඔයා 2021 අවුරුද්දේ බදු වලට 250,000ක් ගෙවල කියල, මේ විදියට අම්මවයි තාත්තවයි යපෙන්නෙක් විදියට එකතු කරාම ඔයාගේ බදු ගෙවිය යුතු ගණන 175,000ක් කියල හිතමු, ඒ කියන්නේ 75,000ක් නැවත ඔයාට tax return (確定申告) එක විදියට ලැබෙනවා.
ලංකාවේ හෝ වෙනත් රටක පදිංචි ඔයාගෙම පවුලේ කෙනෙක්ව යපෙන්නෙක් විදියට එකතු කරන්න නම් මෙන්න මේ ලියකියවිලි අවශ්‍ය වෙනවා.
1. ළමයා/අම්මා/තාත්තා සහ සහෝදර සහෝදරියන් -- ඔයාගේ සහ යපෙන්නෙක් විදියට එකතු කර ගන්න පුද්ගලයාගේ උප්පැන්න සහතික. ආච්චි හෝ සීයා එකතු කරනවා නම් ඔයාගේ අම්මගේ/තාත්තගේ එකත් අවශ්‍යයි.
බිරිඳ/සැමියා -- ඔබගේ උප්පැන්න සහතිකය සහ විවාහ සහතිකය
බිරිඳ/සැමියාගේ මව හෝ පියා -- ඔබගේ උප්පැන්න සහතිකය, විවාහ සහතිකය සහ බිරිඳ/සැමියාගේ උප්පැන්න සහතිකය
බිරිඳ/සැමියාගේ ආච්චි/සීයා - ඔබගේ උප්පැන්න සහතිකය, විවාහ සහතිකය, බිරිඳ/සැමියාගේ උප්පැන්න සහතිකය සහ බිරිඳ/සැමියාගේ මවගේ/පියාගේ උප්පැන්න සහතිකය.
මීට අමතරව අනන්‍යතාව තහවුරු කිරීමට හැකි රජය විසින් නිකුත් කරන ලද ලියවිල්ලක්. (NIC එක හෝ Passport එක)
2. මුදල් යැවූ බව සහතික කිරීම සඳහා ලියකියවිලි. මේවා ඔයා මුදල් යවපු ආයතනයෙන්/ බැංකුවෙන් ගන්න පුළුවන්. Wise වගේ app එකක් භාවිත කරලා මුදල් යවනවා නම් ඒකෙන් PDF විදියට download කරගන්න.
මේ ලියකියවිලි ජපන් භාෂාවට පරිවර්තනය කරලා තමයි ඉල්ලන්නේ, හැබැයි බොහෝ අවස්ථාවල ඉංග්‍රීසි පරිවර්තන භාර ගන්නවා.
සාමාන්‍යයෙන් මාර්තු අග හෝ අප්‍රේල් මාසේ මුල වගේ කාලෙකදී මේ tax return (確定申告) මුදල් ඔයාගේ බැංකු ගිණුමට බැර වෙනවා.
#japantasy
