පසුගිය සතියේ එක්සත් ජනපද සභා කථානායක නැන්සි පෙලෝසිගේ සංචාරයට ප්‍රතිචාරයක් ලෙස චීන හමුදාව තායිවානය වටා සිය මහා පරිමාණ අභ්‍යාස දිගටම කරගෙන ගොස් ඇත. තායිවානයේ ආරක්ෂක අමාත්‍යාංශය ඉරිදා ප්‍රකාශ කළේ චීන හමුදා තායිවානයේ ප්‍රධාන දූපතට සහ මුහුදේ නාවික නැව්වලට ප්‍රහාර අනුකරණය කරමින් අභ්‍යාස සිදු කළ බවයි.
තායිවාන සමුද්‍ර සන්ධිය අවට චීන ගුවන් යානා, යාත්‍රා සහ ඩ්‍රෝන යානා කිහිපයක් ක්‍රියාත්මක වන බව අමාත්‍යාංශ නිලධාරීන් තහවුරු කර ඇත. තායිවාන හමුදාව පවසා ඇත්තේ සුදුසු ප්‍රතිචාර දැක්වීම සඳහා ගුවන් යානා සහ නැව් පිටත් කර යවා ඇති බවයි.
චීන හමුදාව බ්‍රහස්පතින්දා තායිවානය වටකරමින් සමුද්‍රීය ප්‍රදේශ හයක් සහ ගුවන් අවකාශයේ මහා පරිමාණ අභ්‍යාස ආරම්භ කර ඇත. හමුදා නිලධාරීන් පැවසුවේ දේශීය වේලාවෙන් ඉරිදා දහවල් වන විට අභ්‍යාස අවසන් වනු ඇති බවයි. තායිවානයට තවදුරටත් පීඩනය යෙදීම සඳහා චීනයේ හමුදා ක්‍රියාකාරකම් සාමාන්‍ය දෙයක් බවට පත් විය හැකි බවට තිබෙන කනස්සල්ලද වර්ධනය වෙමින් පවතී.
