අඟහරුවාදා අලුයම Hinnamnor ප්‍රබල සුළි කුණාටුව ජපානයේ නිරිතදිග ප්‍රධාන දිවයින වන Kyushu පසුකරමින්, ජපාන මුහුද හරහා උතුරු දෙසට ගමන් කෙරූ අතර එම ප්‍රදේශයට ධාරානිපාත වර්ෂාව සහ තද සුළං ඇති විය. බලධාරීන් පවසා සිටියේ කියුෂුහි මේ වන විට පුළුල් ලෙස විදුලිය ඇනහිටීම් සහ ප්‍රවාහන සේවා අඩාල වී ඇති බවයි.
සාගා ප්‍රාන්තයේ 70 වයස් සීමාවේ එක් මිනිසෙක් කුණාටුවෙන් නිවසේ වහල ආරක්ෂා කිරීමට උත්සාහ කිරීමේදී එයින් වැටී මිය ගිය බවට වාර්තා වී ඇත. අධික වර්ෂාවත් සමඟ ඇති විය හැකි මඩ සහ ගංඟා ජල මට්ටම ඉහළ යෑමේ අවදානම පිළිබඳව ජපාන කාලගුණ විද්‍යා ඒජන්සිය ජනතාවට දිගින් දිගටම අනතුරු අඟවා ඇත.
සුළි කුණාටුව අඟහරුවාදා රාත්‍රිය වන විට නිවර්තන කලාපීය සුළි කුණාටුවක් දක්වා පහත හෙළනු ඇතැයි අපේක්ෂා කළද නැගෙනහිර සහ බටහිර ජපානයට බදාදා දක්වා තද වැසි සහ ගිගුරුම් සහිත වැසි අපේක්ෂා කර ඇත. ජපානයේ උතුරු දෙසින් පිහිටි ප්‍රධාන දූපත වන හොක්කයිඩෝ ද තද සුළං සහ කුණාටු සහිත කාලගුණයෙන් බලපෑම් කළ හැකි බව කාළගුණ ඒජන්සිය පවසා ඇත.
