Hokkaido ප්‍රාන්තයේ Asahikawa හි පිහිටි නාගරික මහල් ගොඩනැගිල්ලක ඝෝෂාකාරී ශබ්දයක් සම්බන්ධයෙන් ඇතිවූ ආරවුලකින් පසු ඉහළ මහලේ ජීවත් වූ කුලී නිවැසියෙකු මරා දමන බවට තර්ජනය කළ එම මහල් නිවාසයේම පහළ මහලේ පදිංචිව සිටි 72 හැවිරිදි පුද්ගලයෙකු ප්‍රාදේශීය පොලිසිය විසින් සැකපිට ඉරිදා දින අත්අඩංගුවට ගෙන ඇති බව වාර්තා වේ .
සෙනසුරාදා රාත්‍රී 7.20ට පමණ මෙම සැකකරු ඔවුන්ගේ මහල් නිවාස සංකීර්ණයේ උඩුමහලට ගොස් එහි පදිංචිව සිටි 70 හැවිරිදි පුද්ගලයාට අයත් නිවසේ දොරට ගසා ඇති අතර තර්ජනයට ලක්වූ පුද්ගලයා පොලිසියට අමතා "මම දොර ඇරියම මිනිහා කිව්වා සද්ද නැතුව හිටියෙ නැත්නම් මරනවා කියලා. පස්සේ ඔහු නැවතත් ඔහුගේ මහල් නිවාසයට බැස ගියා" යනුවෙන් පවසා තිබේ.
අනතුරුව පොලීසිය විසින් සැකකරු අත්අඩංගුවට ගැනීමට කටයුතු කර තිබූ අතර වැඩිදුර ප්‍රශ්න කිරීම් සඳහා ඔහුව රඳවා තබා ගත් බවත් තම උඩුමහලේ අසල්වැසියා විසින් නිතරම නගනු ලබන ඝෝෂාකාරී ශබ්දය තවදුරටත් දරාගත නොහැකි තැනට පැමිණි පසුව එලෙස තර්ජනය කළ බව සැකකරු ප්‍රකාශ කළ බවත් සිදුවීම සම්බන්ධයෙන් අදහස්‌ දක්‌වමින් පොලිසිය මෙහිදී කියා සිටියේය.
